ကျွန်မဖေဖေ တိန့်ရှောင်ဖိန်
ရေးသူ - မော်မော် (Mao Mao)
ယနေ့မှ စ၍ အဖေ အငြိမ်းစား ယူလိုက်ပြီ ဖြစ်သည်။
အဖေ အနား ယူနိုင်ပါပြီ။ လုပ်ငန်းတာဝန်များ မှ သက်သာ ပေါ့ပါးသွားပါပြီ။
အငြိမ်းစား ယူခြင်း သည် အမှန်တကယ်ပင် အငြိမ်းစား ယူ ခြင်း ဖြစ် ရ မည်ဟု အဖေ ပြောခဲ့ ဖူး ပါသည်။
အဖေ ကျန်းမာရန်၊ အသက်ရှည်ရန်၊ ဘဝ နေဝင်ချိန်တွင် ချမ်းမြေ့ သာယာစွာ၊ တည်ငြိမ်စွာ ဖြတ်ကျော် နိုင်ရန် ကျွန်မတို့ တကယ် ပင် မျှော်လင့် မိပါသည်။
အဖေ့တွင် မပြည့်ဝ သေး သော ဆန္ဒ တစ်ခု ရှိ ပါသည်။ ၁၉၉၇ ခုနှစ် ရောက်လျှင် အမိနိုင်ငံတော် အောက် သို့ ဟောင်ကောင်ကျွန်း ပြန် ရောက် လာမည် ဖြစ်သည်။
ပြန် ရောက်လာ လျှင် အမိနိုင်ငံတော် ၏ အစိတ်အပိုင်း တစ်ခု ဖြစ်သော ဟောင်ကောင်မြေ ကို အဖေ ခြေချ လိုသည်။
အဖေ က
“ဝှီးချဲ နှင့် သွား ရ၊ သွား ရ၊ သွားမည်။ ဟောင်ကောင် မြေပြင်တွင် တစ်မိနစ် မျှ ရပ် ရလျှင် ပင် ကျေနပ်ပါပြီ”
ဟု ပြောခဲ့သည်။
ထိုအချိန် ရောက်လျှင် အဖေ့ အသက် မှာ ၉၃ နှစ် ကျော် ရှိ လိမ့်မည်။ အကယ်၍ အားသွန်ခွန်စိုက် ကြိုးစား ဆောင်ရွက် လိုက်ကြ လျှင် အဖေ၏ ဤ မျှော်လင့်ချက် မုချ အကောင် အထည် ပေါ် လာရ မည်ဟု ကျွန်မ တို့ တစ်အိမ်သားလုံး က ယုံကြည် ကြပါသည်။
အဖေ အနားယူ လိုက် သော် လည်း လူအများ က အလွန်ဂရုစိုက် မြဲ ဖြစ်သည်။ အဖေ၏ ကျန်းမာရေး အခြေအနေ ကို အတော် အလေးထား ကြ သည်။
တရုတ် လူမျိုး များ သာမက နိုင်ငံခြားသား များ ကပါ မကြာ မကြာ မေးမြန်း ကြသည်။ သူ့ ဘဝ တစ်ခုလုံး၏ ဆုံးရှုံးမှု၊ စွန့်လွှတ်မှု၊ အကျိုးအကြောင်း အဆိုးအကောင်း မှန်သမျှ ကို စိတ်ဝင်စားကြသည်။
သူ၏ အတွေးအခေါ် နှင့် နိုင်ငံရေး ဘက် တွင် အောင်မြင်မှု ကို ဝေဖန် သုံးသပ် သုတေသန ပြု သူ တို့ မှာ ပြည်တွင်း ရော ပြည်ပ တွင် ပါ အလွန် များပြား လှ သည်။ ရှုပ်ထွေး များမြောင်လှသော အတွေ့အကြုံ တို့ကို လည်း အလွန် စိတ်ဝင်စား ကြသည်။ ဂျာမန်၊ ဟန်ဂေရီ၊ ဟောင်ကောင် နှင့် ပြည်တွင်းမှ စာရေးဆရာ အချို့က အဖေ၏ အတ္ထုပ္ပတ္တိ နှင့် ဝေဖန်သုံးသပ်ချက် တို့ကို ရေးသားခဲ့ ကြသည်။
အဖေ သည် ခံစားချက် ကို စိတ်ထဲ၌ သာ သိုသို သိပ်သိပ် ထားတတ် သည်။ တိတ်တိတ် ဆိတ်ဆိတ် နေတတ် သည်။ စကားနည်းသည်။ မိမိကိုယ် မိမိ ဂုဏ် မဖော် တတ်။
သူဘဝ အတွေ့ အကြုံများ ကို အခြားသူများ အား ပြောပြခြင်း မရှိသည် သာမက သူ့ အနီးအနားတွင် ရှိနေသော ကျွန်မတို့ မိသားစုဝင်များ ကိုပင် အတိတ်က အဖြစ်အပျက်များ အား အနည်းအကျဉ်း သာ ပြောပြခဲ့သည်။ ထို့ကြောင့် လူအများစု မှာ အဖေ၏ ပစ္စုပ္ပန် အဖြစ်အပျက် များကိုသာ ပိုမို သိရှိကြပြီး အတိတ် က အဖြစ်အပျက် များကို သိပ်မသိကြပေ။ သိလျှင်လည်း အပေါ်ယံ မျှသာ သိကြပြီး အတွင်းကျကျ မသိခြင်းကြောင့် အဖေ ၏ ဘဝ ဖြစ်စဉ် များကို မှားမှားယွင်းယွင်း ပြောဆိုနေခြင်းများ ပင် ရှိနေပါသည်။
အဖေ၏ ဘဝသည် သာမန် ရိုးရိုးစင်းစင်း ဘဝ မဟုတ်ပါ။ ထွန်းလင်းတောက်ပ သော ဘဝ တစ်ခု ဖြစ်ပါသည်။
အဖေ၏ ထူးခြားသော ဘဝ အတ္ထုပ္ပတ္တိ ကို ရေး လောက်သော အရည်အချင်း မျိုး ကျွန်မတွင် မရှိပါ။ သို့သော် ကျွန်မ သိသမျှ ကို တော့ ရိုးရိုးသားသား တင်ပြလိုပါသည်။
ဤသည်မှာ ဆယ်ရေးတရေး ကိုးရေးတစ်ရာ ကြိုတင် ပန်ကြား ထားခြင်းဖြစ်ပါသည်။
အရာခပ်သိမ်းတွင် မူလ ဇာစ်မြစ် ရှိပါသည်။
ဇာတ်လမ်းတိုင်းတွင် မူလ အစ ရှိပါသည်။
တိန့်ရှောင်ဖိန် အကြောင်း ရေးမည် ဆိုလျှင်လည်း သူ့ဘဝ စတင်ရာ ဇာတိချက်ကြွေ မွေးရပ်မြေ ဖြစ်သော စီချွမ် မှ အစပြု သင့်ပါသည်။
No comments:
Post a Comment